Son hadisələr haqqında qısa fikirlərim!

Hər bir Azərbaycan övladı kimi, məndə Azərbaycan Milli hərəkatının düzgün və sağlam istiqamətdə yüksəlməsinə, yenilməz bir qüvvəyə çevrilməsinə inanıram və onunlada qürur duyuram.

Biz Azərbaycan türklərinin çox ağır, keçməkeçli və eyni halda çox qürur verici bir tariximiz olmuşdur. Milli-siyasi mücadiləmizin düzgün istiqamətdə yönəlməsi üçün mütləq və mütləq tariximizi tez-tez vərəqləməliyik. Təəssüflər olsun ki, yenədə tariximizin bəzi xoşa gəlməyən məqamları təkrar olmaqdadır. Atalar demişkən ağacı öz içindən qurd yeyən kimi, özümüzə öz içimizdən təhlükə yaranır. Belə ki xaricdə təhlükəsizlik və rifah içərisində yaşayan bəzi şəxslər, özlərini xalq hərəkatının başçısı və qəyyumu sayaraq ümumxalq seçkisi aparmadan qeyri demokratik formada xalq adından ona “bayraq” təyin edib və özlərindən uydurma nəzəriyyələr teorizələşdirib və ulu atamız Babəkin “doğum günü” adı altında yürüşə dəvət edirlər.

Bütövlükdə xalqımız, özəlliklə onun aydın, demokratik və aparıcı qüvvələri belə davranışlarla razılaşmasalarda, ancaq pərdə arxasında baş verən hadisələrdən xəbəri olmadan bir sıra sədaqətli soydaşlarımız bu “ ağaların ” məntiqsiz davranışları nəticəsində İran islam cümhuriyyətinin qəddar qüvvələrinin ciddi basqısına məruz qalırlar.

Beləliklə rejimin zid insanı əməlini qınayıb və soydaşlarımızın azadlığa buraxılmalarını tələb edirik!

Görəsən belə gühahsız, sədaqətli və dəyərli insanlarımız yaxalanıb, qaranlıq zindanlarda işkəncələrə məruz qalmalarına və onların ailələrinin pərişanlığına kimlər cavabdehdir?

Görəsən soydaşlarımız sərbəst buraxıldıqdan sonra ruhən incimələri və vəsiqə ortaya qoymaları onlarin bir daha siyasi- milli fəaliyyətlərinə imkan verəcəkmi ?

Bütün bu xoşa gəlməz davranışları nəzərə alaraq, görəsən Babək qalasına yürüşdən əldə etdiyimiz müsbət nəticə nə oldu?

Görünür ki, Azərbaycan milli-siyasi hərəkatı inkişaf etdikcə mərkəzi hakimiyyətin çeşidli basqıları da davam edir.

Bu hərəkatın sağlam qalması və düzgün yolda hərəkəti üçün Azərbaycan milli hərəkatı özbaşına davranışlardan uzaq olmalı və kollektiv yəni cəmi düşüncə əsasında qabağa getməlidir.

Ötən illərdəki Babək qalasının qurultayları çox önəmli məqamlar olaraq tariximizin şanlı səhifələrindən sayılıcaqdır. Amma təəssüflə son illər rejim o birliyi pozmaqda, mənəm mənəm iddiasında olan ünsürlərdən faydalanması da danılmaz faktdır.

Fikrimcə bu gün Babək qalasına kiçik və pərakəndə qruplar formasında yürüşlər, yüz minlərlə insanımızın iştirakı ilə baş tutmuş qurultaylarımızın möhtəşəmliyinə kölgə salmaqdan və kiçilməkdən başqa bir şey deyildir. Bax budur təkbaşınalığın, fərdiyyətçiliyin və bu kimi hərəkətlərin xoşa gəlməz nəticəsi! Belə davranışlar sonda milli hərəkatımız əleyhinə və mərkəzi hakimiyyətin leyhinə olur. Bu xoşa gəlməz həqiqət mütləq və mütləq diqqət mərkəzində olmalıdır.

Ey Azərbaycan Milli hərəkatının prinsip və qaydalarını pozanlar !!!

Yaxşı bilməlisiniz ki, Xalqımız ayıqdır! O, hərkəsin ipi ilə quyuya düşməz. 1356-ci il bəhmən ayının 29 -da olduğu kimi Azərbaycanımızın və eyni halda başı uca Təbrizimizin hər bir küçəsi, tinindən ziyalı və cəsarətli lider çıxacaq. Amma bu dəfə o, böyük qiyam Azərbaycan naminə olacaqdır.

Qoy bəziləri yaramaz işləri ilə bir-birlərinə, solcu, sağcı, şahcı, dinçi və milliyyətçi …damğaları vurmaqla məşğul olsunlar. Bəs bizim bu darda qalmış vətənimizi kim qurtaracaqdır?

İmperyalistlər tərəfindən bütün dünyada, eləcə də Orta Doğuda gedən dəyişiklikləri, habelə İranın bütün sahələrində ağır durumunu nəzərə alaraq və onu dərindən təhlil edib, ciddi formada təşkilatlanmaq və nailiyyət qazanmaq bizlərin tarixi vəzifələrimizdən sayılır.

Ümumiyyətlə, baş vermiş və gələcəkdə baş verə biləcək hadisələrin qarşısında hamımız sorumluyuq. Ona görədə hamımız bir yerdə güclü bir yumruq kimi bir olmalıyıq. Onda müqəddəs vətənimizi dardan qurtara bilərik.

El gücü birlikdədir.

Mir Musa Haşimi
Malmö, İsveç
10 İyul 2018-ci il
mirmosa1947@gmail.com